Morëm pjesë sot në takimin periodik të progresit të projektit LORAI (Local and Regional Authorities’ Initiative), organizuar nga Njësia e Partneriteteve Institucionale e Kongresit të Autoriteteve Lokale dhe Rajonale të Këshillit të Evropës.
Takimi mblodhi përfaqësues Këshillit të Evropës, NALAS, CEMR dhe shoqatave të qeverisjes vendore nga Ballkani Perëndimor, duke shërbyer si një platformë për shkëmbimin e informacionit mbi aktivitetet në zhvillim, diskutimin e sfidave aktuale dhe koordinimin e hapave të mëtejshëm të projektit.
Gjatë takimit, Drejtoresha Ekzekutive e SHKBSH Adelina Farrici prezantoi zhvillimet më të fundit të Reform Agenda në Shqipëri, duke theksuar rëndësinë e përfshirjes aktive të qeverisjes vendore në zbatimin e reformave që mbështesin procesin e integrimit evropian. U nënvizua se bashkitë luajnë një rol kyç në forcimin e mirëqeverisjes, rritjen e transparencës dhe përmirësimin e shërbimeve për qytetarët. 
Gjithashtu, u prezantua puna e SHKBSH në kuadër të projektit LORAI, me fokus në procesin e mbledhjes së të dhënave përmes pyetësorëve dhe intervistave me përfaqësues të nivelit të lartë të pushtetit vendor. 
Projekti LORAI mbetet një nismë me rëndësi të veçantë për fuqizimin e shoqatave të qeverisjes vendore në Ballkanin Perëndimor, duke nxitur bashkëpunimin rajonal, shkëmbimin e praktikave më të mira dhe forcimin e rolit të pushtetit vendor në procesin e integrimit evropian. 
SHKBSH mbetet e angazhuar për të përfaqësuar interesat e bashkive shqiptare dhe për të kontribuar aktivisht në iniciativa që forcojnë qeverisjen vendore dhe përshpejtojnë rrugëtimin evropian të vendit. 