Javën e kaluar, Shoqata Kombëtare e Bashkive mori pjesë në workshopin rajonal të organizuar nga NALAS, në kuadër të programit të përbashkët të 
Bashkimit Evropian dhe Këshillit të Evropës, LORAI, i cili synon të forcojë përfshirjen e qeverisjes vendore në zbatimin dhe monitorimin e Agjendave të Reformës në Ballkanin Perëndimor.
Gjatë workshopit, drejtoresha ekzekutive Adelina Farrici dhe përfaqësuesit e Shoqatës Kombëtare të Bashkive, kontribuan në diskutimet për identifikimin e treguesve kryesorë të zbatimit të Agjendave të Reformës që lidhen me qeverisjen vendore, si dhe në shkëmbimin e përvojave mbi mbledhjen e të dhënave, monitorimin e reformave dhe sfidat me të cilat përballen bashkitë.
Përmes sesioneve interaktive, pjesëmarrësit diskutuan mënyrat më efektive për mbledhjen e të dhënave 
, monitorimin e progresit dhe sigurimin e burimeve financiare 
për zbatimin e reformave në nivel vendor.
Kontributi i pjesëmarrësve ndihmoi gjithashtu në zhvillimin e LORAI Dashboard, një instrument rajonal që do të mbështesë monitorimin e progresit të Agjendave të Reformës nga perspektiva e qeverisjes vendore, duke promovuar vendimmarrje të bazuar në të dhëna 
dhe bashkëpunim më të ngushtë ndërmjet bashkive dhe partnerëve rajonalë.